Massa vann ráspól eftir spennandi keppni

Felipe Massa hjá Ferrari var í þessu að vinna ráspól kappakstursins í Singapúr eftir spennandi keppni við Lewis Hamilton hjá McLaren og liðsfélaga sinn Kimi Räikkönen. Í lokatilraun sinni velti Massa Hamilton úr efsta sæti með næstum því 0,7 sekúndu hraðari hring.

Sem oft áður tókust ökuþórar Ferrari og McLaren á um pólinn en í síðustu tilraun sinni komst Robert Kubica hjá BMW upp á meðal þeirra og hreppti fjórða sætið, einu á undan Heikki Kovalainen hjá McLaren.

Fjórir Þjóðverjar urðu í sjötta til níunda sæti; Nick Heidfeld hjá BMW, Sebastian Vettel hjá Toro Rosso, Timo Glock hjá Toyota og Nico Rosberg hjá Williams. Félagi hans Kazuki Nakajima varð svo tíundi, sem er hans bestí árangur í tímatökum.

Massa virtist í nokkrum sérflokki miðað við brautartíma, en hann átti besta tíma á öllum köflum brautarinnar í þriðju lotu.

Hamilton mátti hrósa happi að komast í lokalotuna, setti tíunda besta tímann í annarri umferð eftir misheppnaða hringi.

Räikkönen var um tíma í fallsæti í fyrstu lotu en skaust á síðustu sekúndum hennar upp í efsta sæti.

Williamsliðið fagnar þeim árangri að eiga báða bíla í fyrsta sinn á árinu meðal tíu fremstu.

Fernando Alonso á Renault varð fyrir miklum vonbrigðum er bilun í bensínkerfi bílsins stöðvaði för hans í annarri umferð tímatökunnar. Væntingar Renault um sæti á fremstu rásröð voru miklar eftir að hann setti besta brautartíma á æfingum bæði í gær og í dag. Í staðinn steig Alonso mjög svekktur upp úr bíl sínum í brautarkanti. Vegna bilunarinnar hefur hann keppni í 15. sæti.  

Kappaksturshelgin er orðin að martröð fyrir Giancarlo Fisichella hjá Force India áður en sjálfur kappaksturinn er hafin. Á æfingu í morgun stórlaskaði hann bíl sinn og var viðgerð ekki lokið fyrr en langt var liðið á fyrstu lotu tímatökunnar. Hann komst þó ekki lengra en í þriðju beygju, fór full geyst á köldum dekkjum og endaði á öryggisvegg. Skemmdi þó aðeins framvæng að þessu sinni en setti engan tíma og hefur því keppni aftastur.

Niðurstaða tímatökunnar varð annars sem hér segir:

Röð	Ökuþór	Bíll	Lota 1	Lota 2	Lota 3	Hri.
1.	Massa	Ferrari	1:44.519	1:44.014	1:44.801	16
2.	Hamilton	McLaren	1:44.501	1:44.932	1:45.465	14
3.	Räikkönen	Ferrari	1:44.282	1:44.232	1:45.617	16
4.	Kubica	BMW	1:44.740	1:44.519	1:45.779	18
5.	Kovalainen	McLaren	1:44.311	1:44.207	1:45.873	19
6.	Heidfeld	BMW	1:45.548	1:44.520	1:45.964	19
7.	Vettel	Toro Rosso	1:45.042	1:44.261	1:46.244	15
8.	Glock	Toyota	1:45.184	1:44.441	1:46.328	21
9.	Rosberg	Williams	1:45.103	1:44.429	1:46.611	17
10.	Nakajima	Williams	1:45.127	1:44.826	1:47.547	20
11.	Trulli	Toyota	1:45.642	1:45.038		12
12.	Button	Honda	1:45.660	1:45.133		14
13.	Webber	Red Bull	1:45.493	1:45.212		12
14.	Coulthard	Red Bull	1:46.028	1:45.298		16
15.	Alonso	Renault	1:44.971			6
16.	Piquet	Renault	1:46.037			6
17.	Bourdais	Toro Rosso	1:46.389			6
18.	Barrichello	Honda	1:46.583			7
19.	Sutil	Force India	1:47.940			10
20.	Fisichella	Force India	Enginn tími			1