Íþróttir | Formúla 1 | mbl | 11.10.2008 | 6:08 | Uppfært 6:40

Hamilton og McLaren með undirtökin í Fuji

Hamilton vann lotu í rimmunni gegn Massa (t.h.) í tímatökunum í Fuji. ap

Lewis Hamilton hjá McLaren var í þessu að vinna tímatökur japanska kappakstursins í Fuji. Lið hans stendur vel að vígi í rimmunni við Ferrari því félagi hans Heikki Kovalainen varð þriðji. Milli þeirra á rásmarki er Kimi Räikkönen hjá Ferrari en titilkandidatinn Felipe Massa varð aðeins fimmti.

Ráspóllinn er sá sjötti sem Hamilton vinnur á árinu og líklega sá mikilvægasti á lokapsrettinum í rimmu þeirra Massa um heimsmeistaratitil ökuþóra. En McLarenþórinn varð að tjalda öllu því sem hann átti því fyrir síðustu tímatilraunina var hann annar, á milli Räikkönen og Massa.

Räikkönen var eins og nýr maður miðað við undanfarin mót og það var ekki fyrr en á lokasekúndunum sem Hamilton komst upp fyrir hann. Massa bætti sig ekki í lokatilrauninni og hrapaði niður í fimmta sæti er Fernando Alonso á Renault og síðan Kovalainen komust fram fyrir hann í blálokin.

Hugsanlega getur þessi staða Massa veikt mjög vonir hans í titilslagnum en eftir er að koma í ljós hvernig keppnisáætlanir liðanna leggjast.

Robert Kubica hjá BMW varð sjötti en liðsfélagi hans Nick Heidfeld leið hörmungar. Féll út í fyrstu lotu og hefur keppni í aðeins 16. sæti. Aftar hefur hann ekki verið á rásmarki. Í byrjun vikunnar var hann endurráðinn hjá BMW og hefði eflaust viljað fagna því með öðrum hætti en þessum.

Toyotaþórarnir Timo Glock og Jarno Trulli verða á fjórðu rásröð á heimavelli liðsins, en Toyota á Fuji-brautina. Í níunda og tíunda sæti ræsa síðan ökumenn Toro Rosso, Sebastian Vettel og Sebastien Bourdais.

David Coulthard varð ellefti og hafði betur í tímatökum gegn liðsfélaga sínum Mark Webber hjá Red Bull í aðeins annað sinn á árinu. Hondaliðið var slakt á heimavelli, bílar þess hefja keppni á næst öftustu rásröð.

Niðurstaða tímatökunnar varð annars sem hér segir:

Röð	Ökuþór	Bíll	Lota 1	Lota 2	Lota 3
1.	Hamilton	McLaren	1:18.071	1:17.462	1:18.404
2.	Räikkönen	Ferrari	1:18.160	1:17.733	1:18.644
3.	Kovalainen	McLaren	1:18.220	1:17.360	1:18.821
4.	Alonso	Renault	1:18.290	1:17.871	1:18.852
5.	Massa	Ferrari	1:18.110	1:17.287	1:18.874
6.	Kubica	BMW	1:18.684	1:17.931	1:18.979
7.	Trulli	Toyota	1:18.501	1:17.541	1:19.026
8.	Glock	Toyota	1:17.945	1:17.670	1:19.118
9.	Vettel	Toro Rosso	1:18.559	1:17.714	1:19.638
10.	Bourdais	Toro Rosso	1:18.593	1:18.102	1:20.167
11.	Coulthard	Red Bull	1:18.303	1:18.187
12.	Piquet	Renault	1:18.300	1:18.274
13.	Webber	Red Bull	1:18.372	1:18.354
14.	Nakajima	Williams	1:18.640	1:18.594
15.	Rosberg	Williams	1:18.740	1:18.672
16.	Heidfeld	BMW	1:18.835
17.	Barrichello	Honda	1:18.882
18.	Button	Honda	1:19.100
19.	Sutil	Force India	1:19.163
20.	Fisichella	Force India	1:19.910