Toyota býður Trulli framlengingu

Jarno Trulli liggur þessa dagana yfir nýjum samning sem Toyota hefur lagt fyrir hann. Vill liðið hafa hann áfram í sínum röðum og boðið honum framlengingu á samningi út næsta ár, 2010.

Trulli segir það takmark sitt að keppa áfram í formúlu-1 en um tíma þótti líklegra að hann drægi sig í hlé til að sinna fjölskyldu sinni og víngerðarfyrirtæki sem gengið hefur mjög vel.

Nú er hann hins vegar staðráðinn í að halda áfram keppni en hann á 208 mót að baki í formúlu-1. Er það einkum góðar framfarir hjá Toyotaliðinu í ár sem kveikt hafa keppnisneistann að nýju.

Toyota er sagt hafa gert Kimi Räikkönen tilboð um að koma í sínar raðir en þar sem hann hafi afþakkað hafi liðið gert Trulli tilboð um áframhaldandi veru í liðinu.

Sjálfum finnst honum og eiga óklárað verk í formúlunni, en það er að færa Toyota sinn fyrsta mótssigur.  „Það er eitt af markmiðum mínum og ég geri allt til þess að ná því í ár. Ég vona að sú stund renni upp og maður geti gripið gæsina þegar hún gefst,“ segir Trulli.

Trulli fremstur í flokki. reuters

• 1 blogg um fréttina

Bloggað um fréttina

• Gísli Foster Hjartarson: Annað hefði verið skandall