Sebastian Vettel setti besta tímann á seinni æfingu dagsins í Barcelona en þar fer Spánarklappaksturinn fram á sunnudag. Næsthraðast ók liðsfélagi hans hjá Red Bull, Mark Webber, en á fyrri æfingunni voru ökumenn McLaren í tveimur efstu sætum.

Ökumenn Red Bull virtust í nokkrum sérflokki þegar þeir notuðu mýkri dekkin á Katalóníuhringnum undir lok æfingarinnar. Webber var lengst af með besta tímann, en Vettel hafði sætaskipti við hann á lokamínútunum og var sá eini sem komst undir 1:20 mínútna múrinn á hringnum. 

Minni munur var milli næstu manna og munaði aðeins röskri hálfri sekúndu á þriðja til níunda manni. Eins og í morgun var Michael Schumacher hjá Mercedes bestur hinna og öðru sinni í dag leggur hann liðsfélaga sinn Nico Rosberg að velli, en hann setti sjöunda besta tímann.

Fernando Alonso hjá Ferrari endaði í fjórða sæti eftir að hafa bætt brautartíma sína verulega með mýkri dekkin undir í lokin. Lewis Hamilton hjá McLaren setti fimmta besta hringinn en hann ók hraðast í morgun. Ók hann ögn hægar á seinni æfingunni. Robert Kubica hjá Renault setti svo sjötta besta tímann.

Pedro de la Rosa hjá Sauber gat lítið sem ekkert ekið í morgun vegna gírkassabilunar. Það var að baki á seinni æfingunni og ók hann alls 37 hringi á leið til 11. besta tímans.

Af nýju liðunum komst Lotus best frá seinni æfingunni, alveg eins og á þeirri fyrri. Nú var Jarno Trulli á undan liðsfélaga sínum Heikki Kovalainen. Lucas di Grassi  setti 21. besta tímann á eldri útgáfu Virginbílsins en Timo Glock setti aðeins þann 24. besta á nýja bílnum.

Nico Hülkenberg hjá Williams missti vald á bílnum í beygju og endaði á öryggisvegg á sjöunda hring. Skemmdist bíllinn bæði að framan og aftan og var honum ekki ekið frekar.

Niðurstaða æfingarinnar varð annars sem hér segir:

Röð	Ökuþór	Bíll	Tími	Bil	Hri.
1.	Vettel	Red Bull	1:19.965		24
2.	Webber	Red Bull	1:20.175	+0.210	35
3.	Schumacher	Mercedes	1:20.757	+0.792	28
4.	Alonso	Ferrari	1:20.819	+0.854	30
5.	Hamilton	McLaren	1:21.191	+1.226	23
6.	Kubica	Renault	1:21.202	+1.237	36
7.	Rosberg	Mercedes	1:21.271	+1.306	27
8.	Massa	Ferrari	1:21.302	+1.337	25
9.	Button	McLaren	1:21.364	+1.399	26
10.	Sutil	Force India	1:21.518	+1.553	32
11.	de la Rosa	Sauber	1:21.672	+1.707	37
12.	Liuzzi	Force India	1:21.904	+1.939	32
13.	Kobayashi	Sauber	1:21.931	+1.966	29
14.	Buemi	Toro Rosso	1:22.184	+2.219	37
15.	Barrichello	Williams	1:22.192	+2.227	33
16.	Petrov	Renault	1:22.435	+2.470	35
17.	Alguersuari	Toro Rosso	1:22.449	+2.484	34
18.	Hülkenberg	Williams	1:23.765	+3.800	7
19.	Trulli	Lotus	1:24.209	+4.244	26
20.	Kovalainen	Lotus	1:24.894	+4.929	22
21.	di Grassi	Virgin	1:25.066	+5.101	30
22.	Chandhok	HRT	1:25.972	+6.007	23
23.	Senna	HRT	1:26.152	+6.187	25
24.	Glock	Virgin	1:26.596	+6.631	21