Mercedesliðið hafði ástæðu til að fagna eftir reynsluakstur dagsins í Barcelona. Á uppfærðum bíl liðsins setti Michael Schumacher hraðasta hring dagsins og Nico Rosberg þann þriðja besta.

Með þessum uppfærslum er lokið endurbótum á bíl Mercedes fyrir fyrsta mót ársins, í Melbourne eftir hálfan mánuð. Schumacher naut sín vel og ók hringinn í Barcelona hálfri sekúndu hraðar en nokkur annar ökuþór hefur gert á æfingum þar  í vetur, þar til í dag.

Schumacher æfði akstur í morgun eins og um tímatöku væri að ræða og hið sama gerði Fernando Alonso hjá Ferrari, sem var rúmum þremur tíundu úr sekúndu lengur í förum en heimsmeistarinn fyrrverandi.

Vegna óhagstæðs veðurútlits fyrir morgundaginn vék Schumacher fyrir Rosberg seinni partinn svo sá síðarnefndi fengi smá reynslu af nýuppfærðum bílnum við ákjósanlegar aðstæður. 

Bestu hringjum í dag náðu flestir ökumenn er þeir æfðu tímatökur en eftir hádegi tóku langar aksturslotur við hjá flestum. Manna mest ók Alonso eða 141 hring.

Heikki Kovalainen hjá Lotus var skammt undan með 138 hringi sem bendir til að ending sé að verða góð í Lotusbílnum. Tók liðið í noktun í dag ýmsar uppfærslur sem ætlað er að bæta bílinn.

Langar lotur Rubens Barrichello hjá Williams vöktu athygli þar sem dekkin nýttust honum betur en mörgum. Hafði ferð bílsins minnkað um aðeins eina sekúndu á hring eftir 10-12 hringi. Er það mun betri útkoma en áður hefur sést á vetraræfingum liðanna. 

Lítið fór fyrir Red Bull í dag. Sebastian Vettel lét 63 hringi duga og ók aðallega í 5-6 hringja lotum. Lét hann eiga sig að sækjast eftir topphraða eins og fyrr í vikunni.

Williams hugðist skipta akstrinum milli ökumanna sinna en vegna nauðsynlegra mótorskipta náði Pastor Maldonado aðeins 11 hringjum í brautinni í lok dagsins. Mótorskipti bitnuðu einnig á McLaren.

Öll 12 lið formúlunnar voru viðstödd en nýr bíll Hispania, sem frumsýndur var í dag, komst ekki í brautina. Eigi var hægt að aka honum þar sem ekki voru allir íhlutar hans komnir til Barcelona frá bílsmiðjunni í Bretlandi. 

Á morgun er allra síðasti dagur reynsluaksturs fyrir keppnistíðina. Þar verður aðeins helmingur liðanna að störfum, McLaren, Williams, Ferrari, Hispania og Mercedes.

Niðurstaða akstursins í dag varð annars sem hér segir:

Röð	Ökuþór	Bíll	Tími	Bil	Hri.
1.	Michael Schumacher	Mercedes	1:21.249		67
2.	Fernando Alonso	Ferrari	1:21.614	+0.365	141
3.	Nico Rosberg	Mercedes	1:21.788	+0.539	22
4.	Nick Heidfeld	Renault	1:22.073	+0.824	67
5.	Rubens Barrichello	Williams	1:22.233	+0.984	89
6.	Kamui Kobayashi	Sauber	1:22.315	+1.066	98
7.	Jaime Alguersuari	Toro Rosso	1:22.675	+1.426	72
8.	Sebastian Vettel	Red Bull	1:22.933	+1.684	64
9.	Heikki Kovalainen	Lotus	1:23.437	+2.188	138
10.	Paul di Resta	Force India	1:23.653	+2.404	42
11.	Adrian Sutil	Force India	1:23.921	+2.672	26
12.	Pastor Maldonado	Williams	1:24.108	+2.859	11
13.	Jenson Button	McLaren	1:25.837	+4.588	57
14.	Jerome D'Ambrosio	Virgin	1:27.375	+6.126	46