Mark Webber hjá Red Bull hefur keppni af ráspól í breska kappakstrinum í Silverstone á morgun. Annar í tímatökunum varð félagi hans Sebastian Vettel og þriðji Fernando Alonso á Ferrari.

Webber vann breska kappaksturinn fyrir ári og hefur eflaust í hyggju að endurtaka það. Nær allir ökumennirnir settu sína bestu tíma í byrjun lokalotunnar því þegar þeir hugðust gera aðra atlögu að tíma runnu þau áform út í sandinn þar sem hann hóf að rigna.

Helst virðist sem ökumenn Ferrari geti ógnað keppinautunum hjá Red Bull þar sem Alonso og Felipe Massa deila annarri rásröðinni, urðu næstir á eftir Webber og Vettel.

Útlitið er annað en heimaliðið McLaren vænti þar sem Jenson Button varð einungis fimmti og Lewis Hamilton tíundi.

Skotinn Paul di Resta hjá Force India telur Silverstone til heimavallar og hann náði þeim ótrúlega árangri að krækja í sjötta rásstaðinn.

Nýliðinn Pastor Maldonado hjá Williams skein einnig í sólarleysinu í Silverstone með sjöunda rásstaðnum. Hefur hann keppni sæti framar en  Kamui Kobayashi hjá Sauber.

Framgangur þessara þriggja varð meðal annars á kostnað Michaels  Schumacher  hjá Mercedes sem náði einungis þrettánda sæti. Hefur hann keppni fjórum sætum aftar en liðsfélaginn Nico Rosberg.

Heikki Kovalainen hjá Lotus er sjaldséður gestur í annarri lotu tímatöku en þeim árangri náði hann þó í dag. Þangað kominn mátti hann ekki við margnum að lokum.

Athygli vekur einnig, að hvorugur Renaultinn komst í lokalotuna. Niðurstaða tímatökunnar - og þar með rásröðkappakstursins á morgun - varð annars sem hér segir:

Röð	Ökuþór	Bíll	Tími	Bil
1.	Mark Webber	Red Bull	1:30.399
2.	Sebastian Vettel	Red Bull	1:30.431	+0.032
3.	Fernando Alonso	Ferrari	1:30.516	+0.117
4.	Felipe Massa	Ferrari	1:31.124	+0.725
5.	Jenson Button	McLaren	1:31.989	+1.590
6.	Paul di Resta	Force India	1:31.929	+1.530
7.	Pastor Maldonado	Williams	1:31.933	+1.534
8.	Kamui Kobayashi	Sauber	1:32.128	+1.729
9.	Nico Rosberg	Mercedes	1:32.209	+1.810
10.	Lewis Hamilton	McLaren	1:32.376	+1.977
11.	Adrian Sutil	Force India	1:32.617	+0.977
12.	Sergio Perez	Sauber	1:32.624	+0.984
13.	Michael Schumacher	Mercedes	1:32.656	+1.016
14.	Vitaly Petrov	Renault	1:32.734	+1.094
15.	Rubens Barrichello	Williams	1:33.119	+1.479
16.	Nick Heidfeld	Renault	1:33.805	+2.165
17.	Heikki Kovalainen	Lotus	1:34.821	+3.181
18.	Jaime Alguersuari	Toro Rosso	1:35.245	+2.575
19.	Sebastien Buemi	Toro Rosso	1:35.749	+3.079
20.	Timo Glock	Virgin	1:36.203	+3.533
21.	Jarno Trulli	Lotus	1:36.456	+3.786
22.	Jerome D'Ambrosio	Virgin	1:37.154	+4.484
23.	Tonio Liuzzi	Hispania	1:37.484	+4.814
24.	Daniel Ricciardo	Hispania	1:38.059	+5.389
	107% tími:	1:39.156