Lewis Hamilton hjá McLaren vann þýska kappaksturinn eftir spennandi einvígi við Fernando Alonso hjá Ferrari og Mark Webber hjá Red Bull. Skiptust þeir oft á forystu en fyrst og fremst í tengslum við dekkjaskipti en þar reyndist herfræði Hamiltons árangursríkust.

Þetta er annar mótssigur Hamiltons á árinu og sá 16. á ferlinum. Í ræsingunni skaust hann fram úr ráspólshafanum Webber og sigraði með afar vel útfærðum akstri. Alonso komst rétt fram úr honum í forystu í þriðja dekkjastoppi en á ísköldum dekkjum gat hann ekki varist og missti fyrsta sætið strax í fyrstu beygju.

Mjótt var á munum alla tíð milli þessara þriggja og freistaði Webber að bíða eins lengi og hægt var - fram í 56. hring af 60 - til að skipa yfir á hörðu dekkin í þeirri von að vinna sig fram úr Alonso og Hamilton. Það gekk ekki upp og varð Webber að sætta sig við þriðja sæti.

Er þetta í fyrsta sinn á árinu sem Red Bull bíll hafnar ekki í fyrsta eða öðru sæti. Og í fyrsta sinn frá í brasilíska kappakstrinum í fyrra stendur Vettel ekki á verðlaunapalli. Hann hafði gert sér háleitar vonir um sigur á heimavelli sínum.  

Sebastian Vettel hjá Red Bull missti bíla fram úr sér í ræsingunni og var lengst af í fimmta sæti. Fylgdi Felipe Massa hjá Ferrari eins og skugginn hring eftir hring en komst aldrei í nógu nálægt til að reyna framúrakstur.

Í stöðubaráttunni biðu báðir fram á síðasta hring með að skipta yfir á hörðu dekkin, en þar gekk eitthvað úrskeiðis; skiptin tóku lengri tíma hjá Ferrari og Vettel komst fram úr í bílskúrareininni, á leið út í brautina.

Með úrslitunum komst Hamilton aftur upp í þriðja sætið í stigakeppninni um heimsmeistaratitil ökumanna, er fjórum stigum á undan Alonso 134:130, og fimm á eftir Webber 134:139. 

Adrian Sutil hjá Force India átti sinn besta kappkstur á árinu, varð sjötti á heimavelli sínum. Stoppaði hann aðeins tvisvar. Tveir landar hans urðu í næstu sætum, Mercedesþórarnir Nico Rosberg og Michael Schumacher. 

Góð ræsing og frábærlega útfærð tveggja stoppa herfræði fleytti og Kamui Kobayashi hjá Sauber úr 17. sæti upp í það níunda.

Úrslit kappakstursins urðu sem hér segir:

Röð	Ökuþór	Bíll	Tími
1.	Hamilton	McLaren	1:37.30,334
2.	Alonso	Ferrari	+3,980
3.	Webber	Red Bull	+9,788
4.	Vettel	Red Bull	+47,921
5.	Massa	Ferrari	+52,252
6.	Sutil	Force India	+1.26,208
7.	Rosberg	Mercedes	+hring á eftir
8.	Schumacher	Mercedes	+hring á eftir
9.	Kobayashi	Sauber	+hring á eftir
10.	Petrov	Renault	+hring á eftir
11.	Perez	Sauber	+hring á eftir
12.	Alguersuari	Toro Rosso	+hring á eftir
13.	Di Resta	Force India	+hring á eftir
14.	Maldonado	Williams	+hring á eftir
15.	Buemi	Toro Rosso	+hring á eftir
16.	Kovalainen	Lotus	+2 hr. á eftir
17.	Glock	Virgin	+3 hr. á eftir
18.	D'Ambrosio	Virgin	+3 hr. á eftir
19.	Ricciardo	Hispania	+3 hr. á eftir
20.	Chandhok	Lotus	+4 hr. á eftir