Michael Schumacher hlaut alvarlega höfuðáverka er hann féll á skíðum í Meribel í Frakklandi í gær. Þá varð hann fyrir heilablóðfalli og segja læknar háskólasjúkrahússins í Grenoble ástand hans alvarlegt; hann sé ekki úr lífshættu.

Í tilkynningu prófessors Chabardes taugaskurðlæknis og prófessors Payen svæfingalæknis og framkvæmdastjóra spítalans segir að Schumacher hafi hlotið alvarlega höfuðáverka og verið í dái er komið var með hann á sjúkrahúsið. Hafi tafarlaus aðgerð vegna áverkanna verið aðkallandi og framkvæmd. Hún hafi gengið eðlilega fyrir sig en áfram sé líf hans og heilsa í hættu.