Lewis Hamilton kórónaði góða frammistöðu alla keppnishelgina með sigri í Mexíkókappakstrinum rétt í þessu. Minnkaði hann forskot liðsfélaga síns, Nico Rosberg, í titilslagnum í kappakstri sem varð verulega dramatískur undir lokin.

Hamilton hóf keppni af ráspól og ók alla leið af miklu öryggi og var aldrei ógnað. Vann hann þar með sinn 51. sigur í formúlu-1 kappakstri en jafn oft vann franski ökumaðurinn Alain Prost á sínum tíma. Aðeins Michael Schumacher hefur oftar hrósað sigri en þeir.

Rosberg virtist hugsa um það eitt að halda öðru sætinu átakalítið til að verja efsta sætið í stigakeppninni um heimsmeistaratitilinn. Munar nú á þeim 19 stigum, 349:330, Rosberg í vil þegar tvö mót eru eftir. 

Um 10 hringjum frá marki hófst mikið einvígi um þriðja sætið milli Max Verstappen hjá Red Bull og Sebastian Vettel hjá Ferrari. Blandaði Daniel Ricciardo hjá Red Bull sér í þann slag síðustu fimm hringina eða svo og nuddaði sér utan í Vettel en báðir óku afar vel frá þeirri tvísýnu rimmu sem ekki vantaði nema millimetra á að endaði með árekstri.

Verstappen mistókst í vörn sinni gegn sóknum Vettels og þrátt fyrir fyrirmæli af stjórnborði í þá veru gaf hann Vettel ekki eftir sætið eftir að hafa stytt sér leið yfir grassvæði utanbrautar. Dómarar voru lengi að skoða málið en felldu loks úrskurð er Verstappen var við það að ganga út á verðlaunapall með Hamilton og Rosberg. Var hann dæmdur niður í fimmta sæti við það að 5 sekúndum var bætt við keppnistíma hans.