Íþróttir | Fótbolti | mbl | 6.8.2008 | 17:23

Eiður Smári: Ákvörðunin kom að ofan

Eiður Smári í leik með íslenska landsliðinu. AP

Eiður Smári Guðjohnsen, landsliðsmaður í knattspyrnu, segir það hafa verið ákvörðun þáverandi formanns KSÍ, Eggerts Magnússonar, að Eiður og Arnór faðir hans skyldu ekki fá að spila landsleik saman í Eistlandi árið 1996. Þetta kemur fram í viðtali sem The New York Times birti í gær.

Hefðu þeir Eiður og Arnór fengið að spila landsleikinn saman hefði það orðið í fyrsta skipti í sögunni sem feðgar leika knattspyrnuleik fyrir landslið.

„Þetta er löng saga. Faðir minn hafði spilað fyrir landsliðið í 15 ár. Þjálfarinn var undir þrýstingi manna sem vildu að við spiluðum fyrst saman á Íslandi frammi fyrir okkar þjóð. Formaður knattspyrnusambandsins gaf fyrirskipun þess efnis að við ættum ekki að spila saman í leiknum í Eistlandi. Mánuði síðar fótbrotnaði ég svo í leik með U18-landsliðinu og var frá keppni í tvö ár. Þetta var grátlegt því þetta hefði getað orðið stór stund,“ sagði Eiður Smári, en landsliðsþjálfari á þessum tíma var Logi Ólafsson og formaður KSÍ eins og áður segir Eggert Magnússon.

Farið er fögrum orðum um Eið Smára í greininni og þá staðreynd að hann skuli standa af sér þær miklu breytingar sem orðið hafa á Barcelona-liðinu.

„Þegar nýr þjálfari kemur svífa lítil spurningamerki yfir öllum leikmönnum og maður vill sýna sig og sanna,“ sagði Eiður Smári, sem hefur fengið að spila mikið fyrir Barcelona-liðið á undirbúningstímabilinu og virðist sannarlega inni í framtíðaráætlunum þjálfarans Pep Guardiola.

Aðspurður um álagið sem fylgir því að spila fyrir svo sigursælt félag sem Barcelona er í tvö ár án þess að vinna titil svarar Eiður: „Þrýstingurinn er gríðarlegur, þetta er félag fólksins og það er mjög ástríðufullt. Barcelona-liðið er hjartsláttur borgarinnar. Þegar maður vinnur getur maður gengið um brosandi en hvert einasta tap veldur uppnámi. Fólkið vill fyrsta flokks árangur.“