Platini á leið til Íslands

Frakkinn Michel Platini forseti evrópska knattspyrnusambandsins, UEFA, kemur til Íslands föstudaginn 22. október og mun funda með forráðamönnum KSÍ að því er fram kemur á heimasíðu knattspyrnusambandsins.

Með Platini í för verður eiginkona hans,  Christéle Platini, Alan Hansen sem situr í framkvæmdastjórn UEFA og Grikkinn Theodore Theodoridis stjórnarmaður í UEFA.

Þetta verður í annað skiptið sem Platini heimsækir Ísland eftir að hann tók við starfi forseta UEFA árið 2007.  Hann kom árið 2007 þegar hann afhenti sigurlaunin í úrslitakeppni EM U19 kvenna og var einnig viðstaddur vígslu nýrra húsakynna KSÍ.