Rijkaard hættur hjá Galatasaray

Hollendingurinn Frank Rijkaard er hættur störfum sem þjálfari tyrkneska liðsins Galatasaray. Rijkaard hefur verið orðaður við knattspyrnustjóra stöðuna hjá enska félaginu Liverpool og starfslok hans í Tyrklandi ýta undir þann orðróm.

Roy Hodgson knattspyrnustjóri Liverpool hefur farið afleitlega af stað í starfi sínu og er ekki ólíklegt að nýir eigendur Liverpool hafi áhuga á að gera breytingar sem geti bætt stöðu liðsins. Liverpool er sem stendur í næst neðsta sæti ensku úrvalsdeildarinnar.

Rijkaard, sem er 48 ára gamall, var á sínum tíma í fremstu röð sem leikmaður AC Milan á Ítalíu og hollenska landsliðsins. Hann þjálfaði Sparta Rotterdam í Hollandi 2001-2002, hann fór þaðan til Barcelona og var þar í fimm ár. Hann tók við Galatasaray í fyrra.

• 1 blogg um fréttina

Bloggað um fréttina

• Gunnar Th. Gunnarsson: Ekki góður kostur fyrir Liverpool