Argentína féll gegn Úrúgvæ

Gestgjafar Argentínu eru úr leik í Ameríkubikarnum í fótbolta, Copa America, eftir tap fyrir Úrúgvæ í vítaspyrnukeppni í Santa Fé, en liðin skildu jöfn í framlengdum leik, 1:1.

Diego Pérez kom Úrúgvæ yfir á 11. mínútu en Gonzalo Higuaín jafnaði fyrir Argentínu á 17. mínútu. Peréz var síðan rekinn af velli fyrir hlé þegar hann fékk sitt annað gula spjald.

Úrúgvæjar voru því manni færri þar til undir lok venjulegs leiktíma þegar Javier Mascherano, fyrirliði Argentínu, var einnig rekinn af velli með sitt annað gula spjald.

Ekkert var skorað í framlengingu en Fernando Muslera markvörður var hetja Úrúgvæja og varði nokkrum sinnum frábærlega í leiknum.

Í vítaspyrnukeppninni var það svo Muslera sem gerði útslagið. Hann varði frá Carlos Tévez en allir aðrir skoruðu. Úrúgvæ vann vítaspyrnukeppnina 5:4 og mætir Perú í undanúrslitum keppninnar.

• 1 blogg um fréttina

Bloggað um fréttina

• Gísli Foster Hjartarson: Vá hvað það er.......