„Hefði farið fengi ég að ráða“

„Þetta er ömurlegt. Það er alveg ógeðslega leiðinlegt að geta ekki verið með þegar maður fær loks kallið,“ segir Aron Jóhannsson, framherji danska úrvalsdeildarliðsins AGF, í viðtali við Morgunblaðið.

Aron þurfti að draga sig úr landsliðshópnum sem mætir Albaníu og Sviss í undankeppni HM vegna meiðsla í nára. Í hans stað var Guðjón Baldvinsson, framherji sænska 1. deildar liðsins Halmstad, kallaður inn í hópinn.

Aron hefur verið að raða inn mörkum fyrir AGF en hann setti sitt tólfta mark í jafnmörgum leikjum um helgina. Það var þó í þeim leik sem Aron fór virkilega að finna fyrir meiðslunum sem hafa hrjáð hann um nokkurt skeið. „Ég er búinn að vera tæpur í nára síðustu þrjár vikur eða svo. Svo small eitthvað í leiknum í gær og ég er frekar slæmur. Ég er búinn að æfa voðalega lítið undanfarið. Kannski svona þrisvar síðustu tvær vikur. Ég er bara í endurheimt og sjúkraþjálfun svo ég geti spilað þessa leiki,“ segir Aron.

Sjá samtal við Aron í heild í átta síðna íþróttablaði Morgunblaðsins í dag.