Solskjær fær frest til jóla

Hik er á Ole Gunn­ar Solskjær við að skrifa und­ir nýj­an samn­ing um áfram­hald­andi þjálf­un norska knatt­spyrnuliðsins Molde. For­ráðamenn fé­lags­ins hafa beðið eft­ir svari frá Solskjær síðan í sept­em­ber. Þeir hafa núna til­kynnt Solskjær að hann fái ekki lengri um­hugs­un­ar­frest en fram til jóla.

Molde hef­ur náð framúrsk­ar­andi ár­angri und­ir stjórn Solskjær. M.a. varð liðið norsk­ur meist­ari 2011 og 2012 og bikar­meist­ari á ný­af­staðinni leiktíð.

Solskjær hef­ur á und­an­förn­um miss­er­um verið orðaður við þjálf­ara starf hjá nokkr­um fé­lög­um en lengra hef­ur það ekki náð og kapp­inn haldið tryggð við Molde.

Í sept­em­ber lögðu for­ráðamenn Molde nýj­an samn­ing fyr­ir Solskjær sem hann hef­ur ekki svarað ennþá.  Nú­ver­andi samn­ing­ur hans við fé­lagið renn­ur út á kom­andi sumri.  Solskjær er sagður vilja fá tíma til þess að fara yfir mál­in með fjöl­skydu sinni áður en hann ákveður hver næstu skref verða.

• Blogga um frétt