Ragnar Sigurðsson og félagar í Krasnodar unnu afar góðan sigur á CSKA Moskvu í dag, 2:1, í rússnesku úrvalsdeildinni í knattspyrnu. Þannig komst Krasnodar upp fyrir CSKA í 2. sæti deildarinnar.
Það var Brasilíumaðurinn Ari sem skoraði bæði mörk Krasnodar í dag snemma leiks en Roman Eremenko minnkaði muninn á 14. mínútu fyrir CSKA, sem hefur komið mörgum á óvart í Meistaradeildinni í vetur, og þar við sat.
Ragnar, sem skoraði mark Íslands gegn Tékkum síðastliðinn sunnudag, lék að vanda allan leikinn og nældi sér í gult spjald.
Krasnodar er nú með 27 stig eftir 14 leiki en Zenit er efst með 32 stig og á leik til góða sem nú stendur yfir. CSKA er með 25 stig í 3. sætinu.
Það gengur ekki eins vel hjá Sölva Geir Ottesen og félögum í Ural en þeir töpuðu 3:1 í dag fyrir Rubin Kazan og eru í fjórða neðsta sæti með 10 stig.