Íþróttir | Fótbolti | mbl | 24.1.2015 | 11:14

Tók upp símann í miðjum leik - myndband

Áhorfendur geta verið í síma sínum en annað mál gegnir um þátttakendur kappleikja eins og myndbandið í fréttinni sýnir. AFP

Snjallsímanotkun hefur síðustu misseri oft verið á milli tannanna á fólki og margir hafa fengið þá gagnrýni að geta illa slitið sig frá tækinu. Sumir virðast þó lengra leiddir í þeim efnum en aðrir.

Volodymyr Kozlenko, úkraínsku knattspyrnumaður hjá Energiya Nova Kakhova í þriðju deildinni þar í landi, hefur verið gagnrýndur harðlega fyrir að tala í símann í miðjum æfingaleik gegn úrvalsdeildarliði Olimpik Donetsk, en leikurinn var liður í æfingamóti undirbúningstímabilsins í Úkraínu.

Forráðamenn Olimpik Donetsk líktu Kozlenko við trúð eftir leikinn og sökuðu hann um mikla vanvirðingu, en eins og sést á meðfylgjandi myndskeiði tók hann upp símann í miðjum leik og var greinilega ekki með hugann við efnið.

Kozlenko var í kjölfarið dæmdur í bann af knattspyrnusambandinu og má ekki taka þátt í fleiri leikjum á æfingamótinu. Þá var dómari leiksins einnig dæmdur í bann ásamt aðstoðarmönnum sínum fyrir að hafa látið þessa hegðun viðgangast.