Jón Daði á förum frá Viking Stavanger?

Samkvæmt frétt í Aftenbladet, staðarblaðinu í Stavanger, hefur íslenski landsliðsframherjinn í knattspyrnu, Jón Daði Böðvarsson ákveðið að yfirgefa herbúðir Viking Stavanger. Jón Daði vill þó ekki segja til af eða á um téðan orðróm.

Jón Daði segir eftirfarandi í viðtali við Aftenbladet: 

„Við sjáum til hvað gerist. Þar sem Veton Berisha fer frá félaginu í sumar mun ég að öllum líkindum fá meiri spiltíma á næsta tímabili. Það er jákvætt.“

Aftenbladet segist hafa heimildir fyrir því að Jón Daði hafi þrátt fyrir vonir og væntingar um meiri spiltíma ákveðið að yfirgefa félagið á næstunni. Jón Daði vildi ekkert gefa upp um hvort að það ætti við rök að styðjast.

Jón Daði hafnaði nýju samningstilboði Viking Stavanger í vetur, en óvissa með hver mun þjálfa og stýra liðinu á næsta tímabili átti sinn þátt í því að Jón Daði hafnaði samningstilboðinu. Auk þess var Jón Daði ekki ánægður með lítinn spiltíma á síðastliðnu tímabili.

„Ég ætla að bíða og sjá hvaða framtíðaráform félagið hefur. Það er þó ekkert launungarmál að mig langar að spila í öðru landi og í sterkari deild. Þá vil ég fá að spila meira ef ég á að vera áfram hjá Viking Stavanger. Það sem skiptir þó mestu máli er það er félaginu fyrir bestu.“

Jón Daði kom til Viking Stavanger frá Selfoss fyrir þremur árum síðan.  

• 1 blogg um fréttina

Bloggað um fréttina

• Torfi Kristján Stefánsson: Miðlungs leikmaður!