„Við munum vinna Ísland“

Fatih Terim, þjálfari tyrkneska landsliðsins í knattspyrnu, er viss um að lið hans muni vinna íslenska landsliðið er þjóðirnar etja kappi í lokaleik þeirra í undankeppni Evrópumótsins á morgun.

Íslenska liðið tryggði sig inn á Evrópumótið sem fer fram í Frakklandi í síðasta mánuði er liðið gerði markalaust jafntefli við Kasakstan á Laugardalsvelli en karlalandsliðið mun leika á sínu fyrsta stórmóti í Frakklandi á næsta ári.

Tyrkland er aftur á móti í góðri stöðu í 3. sæti riðilsins sem gefur umspilssæti en liðið er tveimur stigum á undan hollenska landsliðinu sem situr í 4. sæti riðilsins. Tyrkir þurfa að ná í það minnsta í stig á morgun en Holland mætir Tékkum.

Terim er vongóður fyrir leik liðsins en hann telur að tyrkneska liðið nái að knýja fram sigur í Konya.

„Tyrkland mun vinna þennan leik. Við munum berjast til sigurs og því tel ég að það lið sem komi til með að standa uppi sem sigurvegari á morgun verði tyrkneska liðið,“ sagði Terim við Daily Sabah Football.

„Við byrjuðum þessa undankeppni á tapi gegn Íslandi en þrátt fyrir að við höfum átt bæði góða og slæma daga í henni þá hefur okkur alltaf tekist að halda okkur í inn í keppninni. Við höfum sýnt mikinn karakter og aldrei gefist upp. Við höfum ekki bara unnið nokkra leiki heldur höfum við einnig uppgötvað nýjar stjörnur,“ sagði Terim að lokum.

• 1 blogg um fréttina

Bloggað um fréttina

• Ómar Ragnarsson: Sá, sem þráir sigurinn meira í jafnri viðureign, vinnur oftast.