Lars Lagerbäck mátti þola stórtap með lærisveinum sínum hjá norska karlalandsliðinu í knattspyrnu í kvöld þegar liðið mætti heimsmeisturum Þjóðverja í C-riðli undankeppni HM í kvöld. Þjóðverjar unnu gríðarlega öruggan sigur, 6:0.
Staðan eftir 20 mínútur var orðin 3:0, en þeir Mesut Özil, Julian Draxler og Timo Werner skoruðu mörkin og Werner bætti við öðru marki fyrir hlé. Staðan 4:0 í hálfleik. Leon Goretzka skoraði fimmta mark Þjóðverja í byrjun síðari hálfleiks og Mario Gómez það sjötta tíu mínútum fyrir leikslok. Lokatölur 6:0.
Þjóðverjar eru með 24 stig í efsta sæti C-riðils en Norður-Írland er í öðru sæti með 19 stig eftir sigur gegn Tékkum í kvöld, 2:0, þar sem Jonny Evans og Chris Brunt skoruðu mörkin.
Norðmenn eru hins vegar í næstneðsta sæti riðilsins með sjö stig eftir átta leiki.