Tékkar véfengja metið hjá Ronaldo

Tékkneska knattspyrnusambandið hefur mótmælt fréttum um að Cristiano Ronaldo sé orðinn markahæsti leikmaður heims hvað varðar mörk fyrir félagslið og landslið.

Ronaldo skoraði sitt 760. mark á ferlinum í gærkvöld þegar Juventus vann Napoli 2:0 í meistarakeppni Ítalíu. Þar með var hann sagður hafa farið framúr hinum tékkneska Josef Bican sem hefði skorað 759 mörk fyrir félagslið sín og landslið Tékkóslóvakíu og Austurríkis á árunum 1931 til 1955.

Nú hefur tékkneska sambandið staðhæft að Ronaldo eigi enn langt í land með að ná metinu af Bican því sá síðarnefndi hafi skorað 821 mark í opinberum mótsleikjum á ferlinum.

Sama var uppi á teningunum fyrir skömmu þegar Ronaldo var sagður hafa farið upp fyrir Pelé og í annað sætið á markalistanum en Pelé hefur verið skráður með 757 mörk fyrir félagslið og landslið. Félag hans í Brasilíu, Santos, mótmælti því harðlega og segir að Pelé hafi skorað 1.091 mark fyrir félagið á sínum tíma. Til viðbótar því er Pelé skráður með 77 mörk fyrir landslið Brasilíu og 37 mörk fyrir New York Cosmos í Bandaríkjunum.

• 1 blogg um fréttina

Bloggað um fréttina

• Ómar Ragnarsson: Þúsundasta mark Pelé fyrir félagslið er enn í fersku minni …