Helena hætt með landsliðið

Helena Ólafs­dótt­ir verður ekki áfram þjálf­ari kvenna­landsliðsins í knatt­spyrnu. Tveggja ára samn­ing­ur henn­ar við Knatt­spyrnu­sam­band Íslands renn­ur út um ára­mót­in en á fundi sem Helena átti með for­manni og fram­kvæmda­stjóra KSÍ í gær var henni tjáð að samn­ing­ur­inn yrði ekki end­ur­nýjaður.

"Ég var afar ósátt þegar mér bár­ust tíðind­in og þetta var tölu­vert högg í and­litið. Ég hafði mik­inn áhuga á því að halda áfram enda fannst mér ég eiga ólokið því starfi sem ég lagði af stað með. Ég óskaði eft­ir fundi með for­ráðamönn­um KSÍ þar sem ég vildi fá að vita framtíð mína. Skýr­ing­arn­ar sem ég fékk voru þær að ég hefði ekki leng­ur virðingu leik­manna og ár­ang­ur liðsins á heim­velli hefði ekki verið nógu góður," sagði Helena við Morg­un­blaðið í gær.

Helena kvaðst frek­ar eiga von á því að hún tæki sér frí frá þjálf­un. Tvö fé­lög leituðu til henn­ar í haust, KR og ÍBV, en hún neitaði báðum. KR hef­ur þegar ráðið Írisi Ey­steins­dótt­ur en ÍBV hef­ur ekki ráðið þjálf­ara í stað Heim­is Hall­gríms­son­ar. Morg­un­blaðið hef­ur heim­ild­ir fyr­ir því að Eyja­menn komi til með að leita til Helenu á nýj­an leik og spurð hvort hún væri til­bú­in að fara til ÍBV ef til henn­ar yrði leitað sagði Helena: "Ég á ekki von á því eins og staðan er í dag. Ég bý í Reykja­vík og lík­leg­ast er að ég taki mér bara frí frá þjálf­un."

Helena tók við þjálf­un landsliðsins af Jör­undi Áka Sveins­syni fyr­ir tveim­ur árum. Liðið lék 14 leiki und­ir henn­ar stjórn, vann fimm, gerði eitt jafn­tefli en tapaði átta.