Ingvar Þór vantar hálfan vinning í titiláfanga

Ingvar Þór Jóhannesson gerði jafntefli við Hjörvar Stein Grétarsson í áttundu og næstsíðustu umferð Kaupþingsmóts Hellis og TR, sem fram fór í kvöld. Ingvari dugar hálfur vinningur gegn Snorra Bergssyni í lokaumferðinni, sem fram fer á morgun, til að tryggja sér sinn annan áfanga að alþjóðlegum meistaratitli.

Í stórmeistaraflokki hefur lettneski stórmeistarinn Normunds Miezis þegar tryggt sér sigur á mótinu en hann hefur 7 vinninga. Jón Viktor Gunnarsson sigraði sænska alþjóðlega meistarann Emil Hermansson í dag. Í meistaraflokki er enski alþjóðlegi meistarinn Robert Bellin efstur með 7 vinninga en Ingvar er annar með 6 vinninga. Snorri Bergsson og Sigurður Daði Sigfússon eru í 3.-5. sæti ásamt franska alþjóðlega meistaranum Charles Lamoureux með 4,5 vinninga.

Í kvennaflokki eru Hallgerður Helga Þorsteinsdóttir og franska skákkonan Izabelle Lamoureux efstar og jafnar með 1,5 vinning. Níunda og síðasta umferð fer fram á morgun, sem og þriðja og síðasta umferð í kvennaflokki, og hefst taflmennska kl. 12.

• 2 blogg um fréttina

Bloggað um fréttina

• Snorri Bergz: Barist til þrautar?
• Gunnar Björnsson: Þokkalegur..........