Guðrún og Ragnar skylmingamenn ársins

Guðrún Jóhannsdóttir, Skylmingafélagi Reykjavíkur, og Ragnar Ingi Sigurðsson, FH, hafa verið kjörin skylmingafólk ársins af stjórn Skylmingasambands Íslands. 

Guðrúnu gekk vel á alþjóðamótum á árinu og má hæst telja glæsilega frammistöðu á Grand Prix heimsbikarmóti í Hanoi þar sem hún  m.a. vann stúlku sem var á meðal tíu efstu á heimslista og var á meðal 32 efstu og á Evrópumeistaramótinu í Gent þar sem hún hafnaði í 28. sæti sem er besti árangur Íslendings á EM.  Hún  var í þriðja sæti á Opna kanadíska meistaramótinu og vann héraðsmeistaramót Quebec.

Ragnar vann öll mót sem haldin voru hér á landi á árinu.   Hann varð Íslandsmeistari í 10. skiptið á árinu og varði Íslandsmeistaratitli í liðakeppni með liði sínu FH.  Á síðasta keppnistímabili sigraði Ragnar á þremur satellite heimsbikarmótum, í Kaupmannahöfn, Helsinki og í Hafnarfirði, og var auk þess á verðlaunapalli í Örebro og Edinborg. Samanlagður árangur á þessum mótum færði honum sigurinn í   Norður-Evrópumótaröðinni.  Ragnar náði fjórða Norðurlandameistaratitlinum á þessu ári.  Auk þess að keppa hefur Ragnar Ingi staðið frábærlega vel að uppbyggingu skylmingastarfs í Hafnarfirði, en hann er aðalþjálfari Skylmingadeildar FH, segir í tilkynningu Skylmingasambands Íslands.

• 1 blogg um fréttina

Bloggað um fréttina

• Heimir Lárusson Fjeldsted: Skylmingasambandið kýs verðugar fyrirmyndir.