Írökum meinuð þátttaka á Ólympíuleikunum

Alþjóða ólympíusambandið tilkynnti í dag ákvörðun sína um að meina keppendum frá Írak þátttöku á Ólympíuleikunum sem fram fara í Peking í ágúst. Þetta gerir sambandið vegna pólitískra ráðninga í stöður ólympíusambands Íraks. Sex íraskir keppendur höfðu náð ólympíulágmörkum.

Forsaga málsins er sú að formanni íraska ólympíusambandsins og nokkrum öðrum meðlimum þess var rænt í júlí árið 2006. Ekkert hefur sést til þeirra síðan.

Írösk stjórnvöld segja starfsmönnunum hafa verið vísað frá vegna spillingar innan nefndarinnar. Í kjölfarið skipuðu stjórnvöld nýja nefnd en slíkt er ekki leyfilegt samkvæmt reglum alþjóða ólympíusambandsins því skipanir í ólympíunefndir eiga ekki að vera pólitískar.

„Við sendum bréf til íraskra stjórnvalda í dag og sögðum frá því að miðað við núverandi aðstæður sé ólíklegt að íraskir íþróttamenn keppi á leikunum í Peking,“ sagði Emmanuelle Moreau, talsmaður alþjóða ólympíusambandsins.

Hussein al-Amidi, formaður íraska ólympíusambandsins, segir írösku keppendurna vera gráti nær vegna tilkynningarinnar.

„Þetta er lokaákvörðun og engin leið til að áfrýja henni. Þetta þýðir að Írak tekur ekki þátt á Ólympíuleikunum. Þetta er áfall fyrir Írak og orðspor þjóðarinnar. Þeir íþróttamenn sem höfðu öðlast keppnisrétt hafa hringt í mig með grátstafinn í kverkunum. Þeir eru í uppnámi,“ sagði al-Amidi.

Í íraska hópnum eru tveir ræðarar, tveir hlauparar, bogamaður, lyftingamaður og júdókappi.

• 1 blogg um fréttina

Bloggað um fréttina

• Oddgeir Einarsson: Ólympíuleikar í hræsni?