Þórður biðst afsökunar

Þórður Þorgeirsson, sem vikið var úr íslenska keppnisliðinu á heimsmeistaramóti íslenska hestsins í Sviss nýlega vegna agabrota, hefur sent frá sér yfirlýsingu þar hann biðst afsökunar á þeim brotum. Fram kom, að Þórður braut gegn reglum um notkun áfengis.

Afsökunarbeiðni Þórðar er eftirfarandi:

Frá barnæsku hefur hestamennskan veitt mér ómælda gleði. Þar hef ég eignast flesta af mínum bestu vinum. Í hestamennskunni liggur mitt ævistarf.

Brottvikning mín úr landsliðinu í hestaíþróttum fyrir agabrot var mér og fjölskyldu minni erfið reynsla.

Eftir að hafa íhugað öll málsatvik fellst ég á að fyrirliði landsliðsins átti engan annan kost í stöðunni.

Það er mikilvægt fyrir ímynd hestamennskunnar á Íslandi og meðal annarra þjóða að fulltrúar Íslands komi þannig fram að sómi sé að, innan og utan keppnisvallar.

Þá er sá þáttur ekki síður mikilvægur sem snýr að þeim stóra hópi ungs fólks sem stundar hestamennsku af alúð og metnaði að hinir eldri geti verið þeim fyrirmynd.

Ég hef fundið fyrir miklum stuðningi og væntumþykju frá hópi vina og kunningja. Fyrir það er ég þakklátur.

Ég bið trúnaðarmenn landsliðsins, hestamenn og aðra velunnara hestamennskunnar afsökunar á agabrotum mínum. 

• 1 blogg um fréttina

Bloggað um fréttina

• Gunnar Th. Gunnarsson: Gott hjá honum