Ingólfur er eftirsóttur erlendis

Ingólfur Tryggvi Elíasson, varnarmaðurinn efnilegi hjá Íslandsmeisturum SA, er eftirsóttur hjá erlendum íshokkífélögum og mun að líkindum leika erlendis á næsta keppnistímabili.

Ingólfur var frekar rólegur yfir stöðu mála þegar Morgunblaðið hafði samband við hann í gær en sagðist hafa sett stefnuna á að komast utan í sumar. Hann sagði þó ekkert vera frágengið í þeim efnum. Eins og sakir standa er líklegast að Ingólfur endi annaðhvort í Álaborg í Danmörku eða hjá Mjölby í Svíþjóð sem samherji hans í landsliðinu, Emil Alengård, leikur með. Ingólfur sagði forráðamenn Mjölby hafa sýnt mikinn áhuga en ekki sé búið að finna hentuga skólavist en Ingólfur hefur lokið tveimur árum í Menntaskólanum á Akureyri og hefur hug á því að halda stúdentsnáminu áfram.

Besti varnarmaður U18-mótsins í Mexíkó

Ingólfur vakti athygli með landsliðum Íslands í vetur. Hann var valinn besti varnarmaður mótsins þegar U-18 ára landslið Íslands sigraði í 3. deild HM í Mexíkó í vetur. Hann lék jafnframt með A-landsliðinu sem vann til bronsverðlauna í Króatíu í 2. deild HM og Ingólfur sagðist hafa fundið fyrir talsverðum áhuga frá útlöndum að því móti loknu.

Ingólfur er hávaxinn og líkamlega sterkur og hefur að sögn viðmælenda Morgunblaðsins alla burði til að ná langt í íþróttinni. Sökum ungs aldurs er hann gjaldgengur með U-20 ára liðum erlendra félaga. Aðallið Mjölby leikur í þriðju deild af sjö í Svíþjóð en Álaborgarliðið er í efstu deild í Danmörku.