Íþróttir | mbl | 27.3.2013 | 21:41 | Uppfært 22:11

SA er Íslandsmeistari

Andri Mikaelsson fyrirliði SA lyftir Íslandsbikarnum í leikslok. mbl.is/Þórir Ó. Tryggvason

Skautafélag Akureyrar varð í kvöld Íslandsmeistari í 16. skipti með því að sigra Björninn, 4:0, í hreinum úrslitaleik um Íslandsmeistaratitil karla í íshokkí í Skautahöllinni á Akureyri í kvöld.

Ingvar Jónsson, þjálfari og leikmaður Akureyringa, kom þeim yfir á 11. mínútu og staðan var 1:0 þar til í þriðja leikhluta. Þá tók SA öll völd og Daninn Lars Foder tryggði liðinu Íslandsmeistaratitilinn með þremur mörkum.

60. LEIK LOKIÐ og SA er Íslandsmeistari.

57. MARK - 4:0. Og það er Lars Foder sem skorar sitt þriðja mark í þriðja leikhluta.

55. MARK - 3:0. Daninn Lars Foder skorar sitt annað mark eftir sendingu frá Birni Jakobssyni og titillinn blasir við SA.

47. MARK - 2:0. Góð sókn SA og Stefán Hrafnsson sendir á Lars Foder sem skorar annað mark liðsins.

41. Þriðji leikhluti er hafinn.

40. mín. - Þrátt fyrir harðan slag kom ekkert mark í öðrum leikhluta og staðan er enn 1:0 fyrir SA. Akureyringar voru fimm sinnum reknir af velli í leikhlutanum en Bjarnarmenn tvisvar.

38. mín. - Ekkert hefur enn verið skorað í öðrum leikhluta en baráttan er mikil.

20. mín. Fyrsta leikhluta lokið og staðan er 1:0 fyrir SA.

11. mín. MARK, 1:0. Ingvar Jónsson kemur SA yfir. Stefán Hrafnsson og Lars Foder lögðu markið upp.

10 mín. Björninn er tveimur færri á vellinum. SA ætti að geta nýtt sér það.

8. mín. Leikurinn er mjög líflegur og greinilegt að liðin ætla að bjóða upp á mikla skemmtun. Björninn hefur skotið mun meira á markið en SA átt hættulegri sóknir.

1. mín. Björninn byrjar með látum og á Daniel Kolar þrjú hörkuskot á upphafssekúndunum.

19.14 - Í leikjum liðanna í úrslitakeppninni hafa þau skipst á að hafa forustu og tölurnar á stigatöflunni hafa sveiflast mikið. Björninn hefur haft betur í fyrsta leikhluta leikjanna, samtals 6:4. Í öðrum leikhluta hafa Bjarnarmenn verið hvað sprækastir en staðan þar er 7:3 þeim í hag. SA Víkingar hafa hins vegar verið á flugi í lokaleikhlutum leikjanna, hafa þar 11:3 yfirburði. munar þar mest um 6:0 skorið úr öðrum leik liðanna í Egilshöll. Samtals hafa liðin skorað 34 mörk í leikjunum fjórum sem gera 8,5 mörk að meðaltali.

Reikna má með gríðarlegri stemningu á Akureyri og enda verður Skautahöllin troðfull.

Staðan í einvíginu er 2:2. Björninn vann fyrst 4:3 á Akureyri en SA vann síðan 8:4 í Egilshöllinni og 5:4 á Akureyri. Björninn jafnaði metin á sínum heimavelli með því að vinna fjórða leik liðanna 4:3.