Íþróttir | mbl | 6.2.2017 | 3:49 | Uppfært 8:20

Ævintýralegur sigur New England

Leikstjórnandinn frábæri, Tom Brady, og Bill Belichick, sem hefur verið aðalþjálfari New England Patriots síðan árið 2000, eftir sigurinn í nótt. AFP

New England Patriots sigraði Atlanta Falcons á ævintýralegan hátt í úrslitaleik ameríska fótboltans, Super Bowl – Ofurskálarleiknum, sem svo er kallaður – í Houston í nótt. Eftir mesta viðsnúning og fyrstu framlengingu í sögu úrslitaleikjanna vann New England 34:28. Ekki er ólíklegt að leikurinn í kvöld verði í framtíðinni talinn besti úrslitaleikur sögunnar.

Leikstjórnandi Patriots, Tom Brady, var lengi í gang en þegar kappinn fór að sýna sitt rétta andlit héldu honum engin bönd. Hann hefur nú unnið fimm úrslitaleiki, fleiri en nokkur annar leikstjórnandi í sögu leiksins. Brady var valinn maður leiksins í nótt, MVP eins og Bandaríkjamenn kalla það (Most Valuable Player). Það er í fjórða skipti sem hann hlýtur þá nafnbót í úrslitaleiknum, oftar en nokkur annar.

Ekki er að efa að Tom Brady verður eftir þetta afrek talinn besti leikstjórnandi sögunnar, jafnvel besti leikmaður sögunnar, og Bill Belichick jafnvel besti þjálfari í sögu deildarinnar. Hann hefur verið aðalþjálfari New England Patriots síðan árið 2000 og stýrði liðinu í nótt til meistaratitils í fimmta skipti.

Atlanta byrjaði frábærlega og náði mest 25 stiga forystu í leiknum. Áður hafði sigurlið mest verið 10 stigum undir í úrslitaleik en með stórkostlegri frammistöðu á lokakafla leiksins gerðist hið ótrúlega. New England gerði síðustu 25 stig hefðbundins leiktíma; staðan var 3:28 þegar rúmar þrjár mínútur voru eftir af þriðja leikhluta!

Matt Ryan, leikstjórnandi Atlanta Falcons, var frábær í leiknum en varð að gera sér tap að góðu. AFP

Frábær byrjun Atlanta

Lið Atlanta virtist koma þjálfurum og leikmönnum New England í opna skjöldu með frábærum varnarleik í fyrri hálfleiknum. Það var nánast sama hvað Tom Brady og hans menn reyndu – Fálkarnir áttu svör við öllu.

Ekkert var skorað í fyrsta leikhluta en Fálkarnir frá Atlanta gerðu tvö snertimörk með stuttu millibili í öðrum leikfjórðungi og bættu við aukastigi í bæði skiptin með vallarmarki. Devona Freeman gerði fyrra snertimarkið, kom Atlanta í 6:0 og Matt Bryant nældi í aukastig með góðu sparki. Austine Hooper gerði seinna snertimarkið og Bryant fékk aftur aukastig. Staðan 14:0. Fálkarnir komust svo í 21:0 eftir að Robert Alford komst inn í sendingu frá Brady, leikstjórnanda Patriots, og hljóp alla leið í mark. Bryant sparkari sá svo enn um að næla í aukastigið.

Fáeinum sekúndum áður en fyrri hálfleik lauk lagaði Patriots stöðuna örlítið – Stephen Gostkowski tryggði liðinu fyrstu þrjú stigin með því að sparka í mark af 41 jards færi.

Atlanta komst í 27:3 um miðjan þriðja leikhluta þegar Tevin Coleman gerði snertimark. Bryant kom svo af bekknum til að sparka og náði í aukastig að vanda.

New England gerði loks snertimark þegar langt var liðið á þriðja leikhlutann. James White hljóp í markið með boltann en sparkari liðsins, Stephen Gostkowkski, sem yfirleitt er mjög öruggur í sínu starfi, sparkaði í stöngina og mistókst að ná í aukastig. Staðan 28:9 í lok leikhlutans.

Gostkowski lagaði stöðuna fyrir Patriots með vallarmarki, 28:12, þegar þriðjungur var liðinn af fjórða og síðasta leikhluta. Þegar sex mínútur voru eftir var munurinn kominn niður í 10 stig þegar Danny Amendola gerði snertimark eftir góða sendingu Brady og James White gerði í kjölfarið tvö aukastig; staðan orðin 28:20.

Stórkostleg tilþrif Edelmann

New England fékk boltann þegar þrjár og hálf mínúta var eftir nálægt eigin endamarki. Fljótlega náði Julian Edelmann að grípa langa sendingu frá Brady á ævintýralegan hátt – tilþrif sem fara í sögubækurnar! Tæpar tvær mínútur eftir og spennan í hámarki. Tekst Brady og félögum hið ómögulega? Þegar mínúta var eftir gerði James White snertimark og minnkaði muninn í 28:26. Og hið ótrúlega gerðist: Danny Amendola skoraði tvö aukastig og jafnaði! Staðan í fjórða leikhluta þá 19:0!

Leikmenn New England náðu að stöðva Fálkana í síðustu sókninni þannig að staðan var jöfn eftir hefðbundinn leiktíma. Því var í fyrsta skipti í sögunni gripið til framlengingar í Ofurskálarleiknum, Super Bowl.

New England vann hlutkestina fyrir framlenginguna. Liðið byrjaði með boltann, komst hægt og rólega fram völlinn og James White, sem lék gríðarlega vel, skoraði snertimark sem tryggði sigurinn.