Vilja að allir ólympíufarar verði bólusettir

Sam­tök ís­lenskra ólymp­íufara, SÍÓ, hafa sent Íþrótta- og ólymp­íu­sam­bandi Íslands, ÍSÍ, áskor­un um að hafa frum­kvæði að því að lík­leg­ir þátt­tak­end­ur á Ólymp­íu­leik­un­um í Tókýó í sum­ar, ásamt þjálf­ur­um og far­ar­stjór­um, verði bólu­sett­ir fyr­ir kór­ónu­veirunni.

Sundmaður­inn Ant­on Sveinn McKee er enn sem komið er eini ís­lenski íþróttamaður­inn sem hef­ur tryggt sér keppn­is­rétt á Ólymp­íu­leik­un­um í sum­ar. Leik­un­um var frestað um eitt ár vegna veirunn­ar en þeir áttu að fara fram í júlí og ág­úst 2020.

Í áskor­un SÍÓ til ÍSÍ kem­ur fram að Alþjóðaólymp­íu­hreyf­ing­in, IOC, hvetji all­ar þjóðir til þess að lík­leg­ir ólymp­íufar­ar fái for­gang varðandi bólu­setn­ingu fyr­ir veirunni til að auka lík­urn­ar á að leik­arn­ir fari fram en blik­ur hafa verið á lofti þess efn­is vegna mik­ill­ar út­breiðslu veirunn­ar víðsveg­ar um heim um þess­ar mund­ir.

Dick Pound frá Kan­ada, reynd­asti stjórn­ar­maður IOC, sagði í viðtali við Sky News á dög­un­um að all­ar þjóðir heims gætu tekið þátt í Ólymp­íu­leik­un­um ef hægt yrði að bólu­setja allt íþrótta­fólkið áður en þeir hæf­ust.

„Frá Kan­ada koma kannski 300 til 400 kepp­end­ur. Ef tekn­ir verða frá 300-400 skammt­ar af bólu­efni af þeim millj­ón­um sem eru til reiðu fyr­ir Kan­ada­búa til að tryggja að landið geti sent kepp­end­ur á Ólymp­íu­leika geri ég ekki ráð fyr­ir al­menn­um mót­mæl­um gegn því. Hver þjóð þarf að taka ákvörðun og það sjón­ar­mið mun koma fram að við séum að troðast fram fyr­ir í röðinni, en ég tel að þetta sé raun­hæf­asta leiðin til að tryggja að leik­arn­ir fari fram,“ sagði Pound.

Fram kem­ur hjá Sky News að IOC sé að kanna leiðir til þess að tryggja að íþrótta­fólk þeirra þjóða sem eru skammt á veg komn­ar hvað bólu­setn­ingu varðar geti fengið bólu­efnið í tæka tíð fyr­ir leik­ana.

• 1 blogg um frétt­ina

Bloggað um frétt­ina

• Þór­dís Björk Sig­urþórs­dótt­ir: Bólu­setja hraust fólk - til hvers?