Opnar sig um fráfall liðsfélaga síns

Sænski íshokkímaðurinn Victor Björkung hefur tjáð sig um áfallið sem fylgdi því að sjá liðsfélaga sinn Adam Johnson fá skautablað í hálsinn í leik með Nottingham Panthers í efstu deild Englands í október síðastliðinum. Johnson lést skömmu síðar af sárum sínum.

„Ég man mest allt. Þetta skeði svo hratt og ég var auðvitað á svellinu þegar þetta gerðist. Manni finnst þetta enn óraunverulegt.

Ég fæ oft endurupplifanir og þær eru ekki mjög ánægjulegar,“ sagði Björkung í samtali við BBC Sport.

Frétt af mbl.is

Lést eftir að hafa skorist á háls með skauta

Eftir áfallið treysti hann sér ekki til þess að spila framar fyrir Panthers og hélt heim til Svíþjóðar skömmu eftir það.

Í gegnum hlífðarbúnaðinn eins og smjör

Björkung kallar eftir því að leikmenn verði skyldaðir til þess að klæðast hlífðarbúnaði sem veitir meiri vernd enda skarst hann sjálfur mjög illa á nára aðeins nokkrum mánuðum síðar.

„Skautablaðið fór í gegnum hlífðarbúnaðinn eins og smjör. Ég er 31 árs gamall og hafði í raun ekki leitt hugann að því hvað þetta getur hættulegt fyrr en á þessu tímabili.

Ég sneri aftur á svellið tveimur mánuðum eftir atvikið en í annarri borg, öðru landi og það tók mig aðeins tvo mánuði að verða sjálfur fyrir skurði.

Þetta var aðeins sentimetra eða tveimur frá slagæðinni í lærinu mínu, þannig að ég var heppinn,“ sagði Björkung.

Klikkun að þetta sé lögreglumál

Frétt af mbl.is

Handtekinn vegna gruns um manndráp í miðjum leik

Leikmaðurinn sem skar Johnson með skautablaði sínu var handtekinn skömmu eftir að hann lést og er laus gegn tryggingu á meðan lögreglan í Suður Jórvíkurskíri rannsakar málið. Björkung finnst það fráleitt að atvikið sé rannsakað sem lögreglumál.

„Þetta er klikkun. Fólkið sem var á svellinu og fólkið í áhorfendastúkunni veit að enginn reynir að gera neitt slíkt viljandi. Þetta er mjög óheppilegt slys og þetta gerist svo hratt. Það er hægt að horfa á myndskeiðið, þysja inn og hægja á þessu og allt svoleiðis.

Það er svo auðvelt að sitja og hugsa með sér að hann hafi gert þetta og hitt en ef þú horfir á þetta þegar þetta gerist í rauntíma veistu að þetta gerist allt of hratt til þess að hægt sé dæma um það,“ sagði Svíinn.

Frétt af mbl.is

Lögreglan rannsakar andlát íshokkímannsins

• Blogga um frétt