Tiger Woods heldur áfram að falla niður heimslistann í golfi og er í 400. sæti á nýjasta listanum. Tiger hefur ekki leikið á móti síðan í ágúst vegna meiðsla, og ekki enn sveiflað kylfu eftir að hann gekkst undir aðgerð á baki í október.
Hann veit ekkert um það hvenær hann mun spila að nýju:
„Ég hef engin svör varðandi það, ekki heldur læknirinn minn. Það er engin tímaáætlun í gangi, og það er verst. Það er í raun ekkert sem ég get hlakkað til, eða byggt á til framtíðar,“ sagði Tiger við fjölmiðla. Hann getur þó huggað sig við að hafa þegar unnið 14 risamót á ferlinum:
„Ég hef afrekað margt á 20 ára ferli. Ef ég afreka ekki meira þá stóð ég mig samt ágætlega. En vonandi get ég keppt aftur við þessa stráka um titlana. Ég sakna þess mjög.“