Íþróttir | Handbolti | mbl | 14.1.2008 | 9:19

Einn heimamaður hjá Svartfellingum

Landsliðshópur Svartfjallalands fyrir EM. Heimasíða handknattleikssambands Svartfjallalands

Svartfjallaland tekur þátt í úrslitakeppni EM í handknattleik í Noregi í fyrsta skipti, enda yngsta sjálfstæða þjóð Evrópu. Svartfellingar hafa tilkynnt 16 manna hóp og aðeins einn leikmaður spilar í heimalandinu.

Það er Goran Dukanovic, skytta úr liði Lovcen, en hinir fimmtán koma frá erlendum liðum. Landslið Svartfjallalands fór glæsilega í gegnum forkeppni EM, fékk 11 stig af 12 mögulegum gegn Hollandi, Finnlandi og Austurríki, og vann svo Portúgali í umspilinu um sæti í lokakeppninni í Noregi, með einu marki samanlagt.

Enginn leikmaður í hópnum hefur spilað meira en 26 landsleiki fyrir þjóð sína, enda hafa leikirnir ekki verið öllu fleiri en það.

Svartfellingar eru í riðli með Rússum, Dönum og Norðmönnum og litlar líkur eru taldar á að þeir nái að vinna leik og komast í milliriðil. Hópur Svartfjallalands er þannig skipaður:

Markverðir:
Goran Stojanovic, Gummersbach (Þýskalandi)
Rade Mijatovic, Rauðu stjörnunni (Serbíu)
Golub Doknic, Conversano (Ítalíu)
Línumenn:
Mladen Rakcevic, Vardar Skopje (Makedóníu)
Marko Pejovic, Vardar Skopje (Makedóníu)
Ratko Durkovic, Pick Szeged (Ungverjalandi)
Hornamenn:
Petar Kapisoda, Bosna (Bosníu)
Aleksandar Svitlica, Granollers (Spáni)
Marko Dobrkovic, Panellinios (Grikklandi)
Skyttur og miðjumenn:
Goran Dukanovic, Lovcen
Drasko Mrvaljevic, Kopar (Slóveníu)
Alen Muratovic, Valladolid (Spáni)
Zoran Roganovic, Lugi (Svíþjóð)
Zarko Markovic, Veszprém (Ungverjalandi)
Mirko Milasevic, Rauðu stjörnunni (Serbíu)
Novica Rudovic, Arrate (Spáni)