Íþróttir | Handbolti | mbl | 31.5.2008 | 15:47

Þurfum gömlu íslensku geðveikina

Róbert Gunnarsson skorar í leiknum gegn Argentínu í gær. Jonas Ekströmer / Scanpix

„Það eru gríðarlegur vilji og löngun í þessum hópi til að fara alla leið, enn meiri en oftast áður eftir því sem þeir segja sem hafa verið lengi í kringum liðið," sagði Óskar Bjarni Óskarsson aðstoðarþjálfari karlalandsliðsins í handknattleik en það mætir Pólverjum í undankeppni Ólympíuleikanna klukkan 18.15 í Wroclaw.

Takist íslenska liðinu að sigra Pólverja í Hala Stulecia, þeirri stórbrotnu keppnishöll, í kvöld verður það á meðal þátttökuliða á Ólympíuleikunum í Peking í sumar.

Óskar Bjarni sagði að undirbúningurinn hefði gengið eðlilega fyrir sig í dag. „Það var æfing fyrir hádegið og síðan fundir þar sem farið var yfir leikinn og mótherjana. Það eru allir klárir í slaginn, enginn með nein meiðsli sem skipta máli, og menn eru fyrst og fremst fullir eftirvæntingar og tilbúnir að takast á við þetta gríðarsterka lið Pólverja."

Hann sagði að íslenska liðið væri undir það búið að Pólverjar reyndu að keyra yfir það með látum á fyrstu 10-15 mínútum leiksins. „Þeir eru vanir að spila þannig og við þurfum að vera tilbúnir til að standa gegn þeim á þessum upphafskafla leiksins, komast yfir hann með þolinmæði og skynsemi, og svo þurfum við ágætan skammt af gömlu íslensku geðveikinni ef okkur á að takast að sigra þá. En það var athyglisvert að Pólverjarnir virtust þreytast fljótt í leiknum við Svía og við reynum að nýta okkur það, nota hópinn vel, keyra hraða miðju á þá og vera tilbúnir á allan hátt," sagði Óskar Bjarni.

Hann fylgdist með leiknum í gærkvöld milli Pólverja og Svía og tók undir það að stemmningin í höllinni hefði verið mögnuð. „Þetta var virkilega skemmtilegt, bæði hávaðinn í áhorfendum og tónlistin sem þeir nota til að kynda upp. Það verður gríðarlegur hávaði á leiknum, það er alveg ljóst."

Íslenska liðið er þessa stundina á hóteli sínu í Wroclaw en er væntanlegt í Hala Stulecia með rútu um 16.30 að íslenskum tíma, um það bil sem fyrri hálfleik hjá Svíþjóð og Argentínu er að ljúka en þar verður flautað til leiks klukkan 16.00.