Íþróttir | Handbolti | mbl | 31.10.2008 | 10:39

Lúxemborgarar stóðu í Ólympíumeisturunum

Thierry Omeyer, markvörður, náði sér ekki á strik í Lúxemborg í gær og var m.a. skipt út af sem ekki gerist oft í landsleikjum Frakka. mbl.is/Brynjar Gauti

Lúxemborgarar sýndu Ólympíumeisturum Frakka enga sérstaka virðingu þegar þjóðirnar mættust í undankeppni Evrópumóts karla í handknattleik í Lúxemborg í gærkvöldi. Lengst af leiknum áttu leikmenn Lúxemborgar í fullu tré við ólympíumeistaranna en urðu að gefa eftir á endasprettinum, lokatölur 30:21, fyrir Frakkar eftir að aðeins munaði tveimur mörkum á þjóðunum í hálfleik, 15:13.

Lúxemborgarar eru ekki á meðal stærri handknattleiksþjóða Evrópu en áhugi fyrir íþróttinni hefur farið vaxandi síðustu ár og meðal annars tók meistaralið landsins þátt í forkeppni meistaradeildar Evrópu í haust.

Alls mættu 4.600 áhorfendur á leikinn í Lúxemborg í gær sem er met þar í landi en áður höfðu áhorfendur verið flestir 2.200 á handboltaleik í landinu. Vel studdir af áhorfendum sýnu leikmenn Lúxemborgar fínan leik og náðu m.a. einu sinni forystu, 8:7. Frakkar áttu greinilega ekki von á þessari miklu mótspyrnu og voru mestu vandræðum með leik sinn en tókst að ná tveggja marka forskoti fyrir lok fyrri hálfleiks, 15:13.

Þegar á leið síðari hálfleik kom berlega í ljós að Frakkar voru í betra líkamlegu formi en leikmenn Lúxemborgar og þar með sigldu þeir fyrrnefndu framúr og unnu loks með níu marka mun.

Þetta var fyrsti landsleikur Frakka eftir að þeir unnu Íslendinga í úrslitaleik handknattleikskeppni Ólympíuleikanna í Peking.