Frábært sigurmark (myndband)

Barein tryggði sér þátttökurétt í fyrsta sinn á heimsmeistaramóti í handknattleik karla í gær með sigri á Sádi-Arabíu, 26:25, í Asíukeppninni með hreint ævintýralegu marki á næst síðustu sekúndu leiksins.

Sádi-Arabar voru með boltann þegar sjö sekúndur voru eftir af leiknum í jafnri stöðu, 25:25. Þeir voru auk þess tveimur mönnum fleiri. Markvörður Barein varði síðasta skot Sádi-Araba, boltinn barst til Bareinans Saeed Jawhar sem kastaði yfir endilangan leikvöllinn og hitti  markið án þess að markvörður Sáda fengi rönd við reist, hreint stórkostlegt mark.

Sigurmark Barein.

Barein og Suður-Kórea leika til úrslita í Asíukeppninni en Sádi-Arabar eiga ennþá möguleika á að tryggja sér farseðilinn á HM en til þess verða þeir að vinna Japani í viðureign um þriðja sætið. Þrjár efstu þjóðir Asíukeppninnar verða með á HM sem hefst í Svíþjóð um miðjan janúar á næsta ári.

• 2 blogg um fréttina

Bloggað um fréttina

• Gunnar Th. Gunnarsson: Dramatískara verður það varla
• Ómar Ragnarsson: Laddi var enn flottari !