Hefur ekki tekið þátt í Evrópukeppni í 18 ár

„Þetta er mjög spennandi verkefni, ég er ánægður með ferðalagið. Það er fínt að fá að sleppa við að fara langt inn í Austur-Evrópu. Ferðalagið er frábært og andstæðingurinn er spennandi," sagði Einar Andri Einarsson, þjálfari Aftureldingar eftir að ljóst varð að liðið mun mæta Bækkela­get frá Nor­egi í fyrstu umferð EHF-bikar karla í handknattleik.  

„Þeir lentu í öðru sæti í deildinni og duttu út í átta liða úrslitum, fyrstu umferð. Það hefur verið mikil vonbrigði fyrir þá, þetta er hörkulið og spennandi einvígi."

Bækkelaget endaði með 31 stig í norsku deildinni í fyrra, eins og Haslum, sem Valsmenn slógu út í Áskorendabikarnum á síðustu leiktíð. 

„Við teljum okkur eiga góða möguleika en við berum mikla virðingu fyrir þeim. Þetta er verðugt verkefni en við ætlum okkur áfram í aðra umferð. Þetta er spennandi verkefni fyrir okkur, Afturelding ekki tekið þátt í Evrópukeppni í 18 ár og þetta er nýtt fyrir okkur."

Nái Afturelding að slá Bækk­ela­get úr leik bíður Do­brogea Sud Const­anta frá Rúm­en­íu í 2. um­ferð.

„Constanta er nokkuð sterkt lið og það er verðugt verkefni ef við klárum þetta, við tökum því fagnandi ef við klárum Norðmennina," sagði Einar Andri að lokum. 

• Blogga um frétt