Selfyssingar leggja fram kæru

Handknattleiksdeild Selfoss hefur kært framkvæmd leiks Fram og ÍBV í Olís-deild karla í handknattleik sem fram fór síðastliðinn miðvikudag. ÍBV sigraði með einu marki og tryggði sér þar með deildarmeistaratitilinn. Þetta kemur fram á sunnlenska.is.

Af upptökum sem birst hafa af leiknum kemur í ljós að ÍBV var með of marga leikmenn inni á vellinum á síðustu sekúndum leiksins.

„Samkvæmt leikreglum HSÍ er ljóst að refsing við broti sem þessu er brottvísun leikmanns og vítakast til handa mótherja. Úrslit leiksins ráða því hvort ÍBV eða Umf. Selfoss séu deildarmeistarar og varðar því rétt framkvæmd leiksins miklu fyrir bæði félögin,“ segir Þórir Haraldsson, formaður handknattleiksdeildar Selfoss, í samtali við sunnlenska.is.

Selfyssingar gera kröfu um að sá leiktími sem eftir var af leik Fram og ÍBV þegar atvikið kom upp verði endurtekinn, en til vara að leikurinn verði spilaður aftur í heild sinni.

Frétt af mbl.is

Fram átti að fá víti eftir sigurmarkið

• 1 blogg um fréttina

Bloggað um fréttina

• Björn Jónsson: Íþróttaandi.