Færeyska karlalandsliðið í handknattleik komst loks ásamt fylgdarliði frá Færeyjum og er á leið til Skopje í Norður-Makedóníu þar sem liðið á fyrir höndum mikilvægan leik í umspili um laust sæti á HM 2025 síðdegis á morgun.
Færeyski miðillinn Roysni.fo greinir frá því að liðið hafi farið í loftið klukkan 15 í dag þar sem var flogið með það til Billund í Danmörku.
Þaðan flaug liðið með einkaflugvél beint til Skopje og er ráðgert að hópurinn verði kominn upp á hótel þar í borg í kringum miðnætti.
Erfiðlega hafði gengið að komast frá Færeyjum og lagði hópurinn af stað sólarhring síðar en áætlað var vegna erfiðra aðstæðna í Vogum; svartaþoku og óhagstæðs hliðarvinds.
Færeyingar unnu fyrri leikinn á heimavelli með sjö mörkum, 34:27, og freista þess að komast á heimsmeistaramót í fyrsta sinn í sögunni.
Síðari leikurinn í Skopje hefst klukkan 17 á morgun.