Óðinn Þór Ríkharðsson átti fyrirtaks leik fyrir Kadetten Schaffhausen þegar liðið mátti sætta sig við tap fyrir Kriens, 30:32, í fyrsta leik liðanna í úrslitaeinvígi svissneska handboltans í Schaffhausen í dag.
Vinna þarf þrjá leiki til þess að tryggja sér svissneska meistaratitilinn. Kadetten byrjar á heimatapi og hefur því verk að vinna í næsta leik, sem fer fram í Kriens á fimmtudag.
Óðinn Þór var á meðal markahæstu manna í leiknum en hann skoraði sex mörk, þar af þrjú úr vítaköstum.