Blatter aðvarar Sarkozy

Sepp Blatter, forseti Alþjóða knattspyrnusambandsins FIFA, hefur varað Nicolas Sarkozy við að skipta sér af innanbúðarmálum franska knattspyrnusambandsins. Blatter segir til greina komi að útiloka Frakka frá þátttöku í alþjóðlegum mótum ef það sannast að stjórnmálamenn hafi afskipti af málefnum sambandsins.

Blatter segir þetta í framhaldi af afsögn forseta franska knattspyrnusambandsins í gær en  Sarkozy hafði áður sagt að stjórnendur franska sambandsins ætti að íhuga sína stöðu. Þá hefur Sarkozy einnig sagt að hann vilji láta fara fram sérstaka rannsókn á því hvað valdið hafi slökum árangri franska landsliðsins á heimsmeistaramótinu í Suður-Afríku.

FIFA hefur nokkrum sinnum gripið til þess ráðs að setja knattspyrnusambönd í keppnisbann vegna pólitískra afskipta. Nokkur Afríkuríki hafa lent í banni og aðeins eru fáein ár síðan pólska knattspyrnusambandið var sett í tímabundna gjörgæslu af hálfu FIFA eftir að stjórn sambandsins var skipt úr fyrir menn sem voru hallir undir þáverandi stjórnvöld.

Frakkar verða gestgjafar Evrópumeistaramótsins í knattspyrnu 2016.

• 1 blogg um fréttina

Bloggað um fréttina

• Ólafur Ingi Hrólfsson: FIFA guðinn