Íþróttir | HM í fótbolta | mbl | 29.6.2010 | 10:37

Blatter biður England og Mexíkó afsökunar

Sepp Blatter fylgist með leik Bandaríkjanna og Gana ásamt Bill Clinton, fyrrum forseta Bandaríkjanna. Reuters

Sepp Blatter, forseti Alþjóða knattspyrnusambandsins, FIFA, hefur beðið Englendinga og Mexíkóa afsökunar á mistökum dómaranna í leikjum liðanna í 16-liða úrslitum HM í Suður-Afríku.

Úrúgvæskur aðstoðardómari sá ekki að Frank Lampard skoraði fyrir England gegn Þýskalandi þegar hann skaut í þverslána og inn í leik þjóðanna, og ítalskur kollegi hans sá ekki að Carlos Tévez var rangstæður þegar hann kom Argentínu yfir gegn Mexíkó.

„Ég talaði við fulltrúa knattspyrnusambanda þessara tveggja landa í gær um mistök dómaranna. Ég bað þá afsökunar og ég skil vel að menn séu ósáttir og hafi gagnrýnt frammistöðu þeirra," sagði Blatter við fréttamenn í morgun.

Blatter sagði jafnframt að möguleikinn á að beita sjónvarpstækni við að skera úr um hvort mörk séu skoruð verði ræddur á fundi hjá FIFA í næsta mánuði.