Tennur losnuðu í de Zeeuw

Miðvallarleikmaðurinn Demy de Zeeuw fékk harkalegt spark í andlitið í undanúrslitaleik Hollands og Úrúgvæ á HM í knattspyrnu í gær. Í fyrstu var talið að hann hefði kjálkabrotnað en svo slæm var útkoman ekki.

De Zeeuw, sem var skipt af leikvelli eftir fyrri hálfleik, var sendur uppá sjúkrahús þar sem kom í ljós að aðeins höfðu losnað nokkrar tennur í gómi kappans. Hann mun því verða leikfær þegar úrslitaleikurinn fer fram næstkomandi sunnudag kl. 18:30.