Hádramatískur belgískur sigur

Belgía tryggði sér sæti í átta liða úrslitum á HM í Rússlandi með mögnuðum 3:2-sigri á Japan í Rostov við Don í kvöld. Japan komst í 2:0, en Belgar neituðu að gefast upp og Nacer Chadli skoraði sigurmarkið á síðustu mínútu uppbótartímans.

Staðan var markalaus í hálfleik en það tók Japana aðeins þrjár mínútur að komast yfir í seinni hálfleik með marki Genki Haraguchi eftir glæsilega skyndisókn. Aðeins fjórum mínútum síðar bætti Takashi Inui við öðru marki fyrir Japan og allt benti til þess að stjörnum prýtt lið Belga væri úr leik á HM. 

Á 65. mínútu gerði Roberto Martínez, þjálfari Belga, tvöfalda breytingu er hann setti Marouane Fellaini og Nacer Chadli inn á og átti það heldur betur eftir að borga sig. 

Fimm mínútum síðar minnkaði Jan Vertonghen muninn með ótrúlegum skalla, úr þröngu færi, lengst utan úr teig. Á 74. mínútu var Marouane Fellaini búinn að jafna með öðrum skalla, nú af stuttu færi eftir sendingu Eden Hazard. 

Þegar flestir voru að búa sig undir framlengingu lögðu Belgar af stað í skyndisókn eftir hornspyrnu japanska liðsins. Nokkrum sekúndum síðar var Nacer Chadli búinn að skora af stuttu færi eftir sendingu Thomas Meunier og belgískur sigur staðreynd. 

Belgar mæta Brasilíu í átta liða úrslitum í Kazan á föstudaginn kemur. 

Belgar fagna sigurmarkinu. AFP

Belgía	3:2	Japan	Opna lýsingu Loka
90. mín. Japan fær hornspyrnu Witsel potar boltanum í átt að eigin marki en Courtois kemur í veg fyrir að hann skori sjálfsmark með að verja vel.
Augnablik — sæki gögn...

• 1 blogg um fréttina

Bloggað um fréttina

• Ómar Ragnarsson: Hver segir að HM þurfi að vera leiðinlegt? "Hraðinn drepur."