Íþróttir | HM í fótbolta | mbl | 11.7.2018 | 20:45 | Uppfært 12.7.2018 5:44

Króatar í úrslit í fyrsta skipti

Króatar leika við Frakka í úrslitaleik HM í fótbolta í Rússlandi á sunnudaginn kemur. Króatar höfðu betur á móti Englendingum í Moskvu í kvöld, 2:1, eftir framlengdan leik og leika til úrslita í fyrsta skipti.

Englendingar byrjuðu með látum því Kieran Tripper skoraði glæsilegt mark, beint úr aukaspyrnu og reyndist það eina mark fyrri hálfleiksins. Króatar tóku heldur betur við sér í síðari hálfleik og urðu betri eftir því sem leið á leikinn.

Að lokum jafnaði Ivan Perisic metin er hann stýrði boltanum í netið af stuttu færi eftir fyrirgjöf frá hægri. Króatar freistuðu þess að bæta við marki en það tókst ekki og því var framlengt.

Bæði lið fengu góð færi í fyrri hluta framlengingarinnar en inn vildi boltinn ekki. Í síðari hlutanum skoraði hins vegar Mario Mandzukic sigurmarkið á 109. mínútu og þar við sat. England leikur því um þriðja sætið við Belgíu.

Mario Mandzukic kemur Króötum yfir í framlengingunni. AFP

Króatía	2:1	England	Opna lýsingu Loka
120. mín. Andrej Kramarić (Króatía) á skot framhjá Kominn einn í gegn og reynir skotið en boltinn fór í hliðarnetið. Perisic var í betra færi innan teigs.
Augnablik — sæki gögn...