Frakkar voru ekki í nokkrum vandræðum með að sigra Argentínumenn í sextán liða úrslitum heimsmeistaramóts karla í handknattleik í Katar í kvöld. Lokatölur urðu 33:20.
Frakkar mæta því Slóvenum í átta liða úrslitunum á miðvikudaginn.
Frakkar breyttu stöðunni úr 6:3 í 10:3 um miðjan fyrri hálfleik og þar með var mótspyrna Argentínumanna brotin á bak aftur. Staðan var orðin 16:6 í hálfleik og 25:11 um miðjan síðari hálfleik.
Valentin Porte skoraði 6 mörk fyrir Frakka, Guillaume Joli 5 og Michaël Guigou 4 en Gonzalo Matias Carou gerði 4 mörk fyrir Argentínumenn.