Eiríkur ætlar að halda áfram hjá ÍR

Eiríkur Önundarson körfuknattleiksmaður úr ÍR hefur ákveðið að halda áfram að leika körfuknattleik með ÍR, en hann hugðist hætta eftir síðustu leiktíð.

Í tilkynningu frá ÍR segir: „Eiríkur Önundarson hefur verið lykilmaður körfuknattleiksliðs ÍR í ára raðir. Reynsla hans hefur verið liðinu mikill styrkur innan vallar sem utan og hefur hann verið fyrirliði liðsins undan farin ár.

Hann hafði hug á að hætta körfuknattleiksiðkun eftir sl. tímabil. En nú hafa ÍR-ingar gert samkomulag við Eirík um að spila áfram með liðinu og jafnframt verður hann aðstoðarþjálfari Jóns Arnars Ingvarssonar og þykir Jóni þetta mikill fengur fyrir sig og liðið.

Þetta eru mikil gleðitíðindi og lýsir stjórn körfuknattleiksdeildar ÍR yfir mikilli ánægju með þessa ákvörðun Eiríks. ÍR-ingar hafa allan hug á að ná langt á komandi tímabili. Halda áfram að byggja á þeim frábæra árangri sem liðið náði í úrslitakeppninni sl. vor. Þetta samkomulag er mikilvægur þáttur fyrir þá vinnu.“

• 1 blogg um fréttina

Bloggað um fréttina

• Dunni: Gleðitíðindi í Breiðholtið.