„Við höfðum yfirhöndina allan tímann“

 Íslenska karlalandsliðið í körfuknattleik gerði sér lítið fyrir og vann öruggan 66:54 sigur á Danmörku í Álaborg í gær í B-deild Evrópukeppninnar, en þar með hóf liðið seinni hluta keppninnar. Þetta er annar sigur Íslands í sínum riðli og báðir hafa þeir komið gegn gömlu herraþjóðinni.

„Strákarnir gerðu bara það sem þeir hafa verið að gera undanfarið. Þeir voru grimmir í vörninni og duglegir og það er eitthvað sem getur alltaf fleytt okkur langt. Ég er bara mjög sáttur við leikinn,“ sagði Sigurður Ingimundarson þjálfari eftir leikinn.