Íþróttir | Körfubolti | mbl | 26.5.2010 | 7:37

Phoenix jafnaði gegn Lakers

Robin Lopez (15) fagnar eftir 3ja stiga körfu frá félaga hans, Jason Richardson (23), fyrir Phoenix gegn Lakers. Reuters

Phoenix Suns jafnaði í nótt einvígið gegn LA Lakers með góðum heimasigri, 115:106. Liðin eru þar með jöfn, 2:2, í baráttu sinni í úrslitum Vesturdeildar NBA í körfuknattleik.

Það voru varamenn Phoenix, með Channing Frye í fararbroddi, sem gerðu útslagið að þessu sinni en þeir skoruðu 54 af 115 stigum liðsins, á meðan varamenn Lakers gerðu aðeins 20 stig í leiknum. Frye og Leandro Barbosa skoruðu 14 stig hvor.

Af byrjunarliðsmönnum Phoenix var Amar'e Stoudamire atkvæðamestur með 28 stig og tók 10 fráköst. Nefbrotinn Steve Nash skoraði 15 stig og átti 8 stoðsendingar.

Kobe Bryant var áfram í góðum gír hjá Lakers þó það dygði ekki til en hann skoraði 38 stig og tók 10 fráköst. Pau Gasol skoraði 15 stig.