Boston Celtics sigruðu Indiana Pacers í fyrsta leik undanúrslita NBA deildarinnar í körfubolta í nótt eftir framlengdan leik, 133:128. Jaylen Brown bjargaði heimamönnum í Boston með þriggja stiga körfu á lokasekúndum venjulegs leiktíma.
Boston var fyrirfram talið sigurstranglegra liðið í viðureigninni og komst í 12:0 strax í upphafi leiks en Indiana komst aftur inn í leikinn og munaði mikið um sex þriggja stiga körfur frá leikstjórnandanum Tyrese Haliburton. Sjö leikmenn Pacers skoruðu fleiri en tíu stig í leiknum.
Þegar örfáar sekúndur voru eftir af venjulegum leiktíma og Indiana var þremur stigum yfir, 117:114, tók Jrue Holiday innkast undir körfu Pacers, Derrick White setti hindrun fyrir Jaylen Brown en Pascal Siakam náði að setja mikla pressu á skot Brown, það kom ekki að sök og Brown jafnaði leikinn og tryggði Celtics framlengingu.
Mikil spenna og fjölmörg einstaklinsmistök einkenndu framlenginguna en Boston reyndust sterkari á svellinu og sigldu fimm stiga sigri, 133:128, í hús og taka 1:0 forystu í einvíginu. Liðin mætast á nýjan leik aðfaranótt föstudags.
Jayson Tatum skoraði 36 stig fyrir heimamenn og tók tólf fráköst, Brown skoraði 26 og Holiday 28. Í annars jöfnu liðið Pacers var Haliburton með 25 stig, Siakam 24, tólf fráköst og sjö stoðsendingar og stóri maðurinn Myles Turner með 23 stig og tíu fráköst.